Kurti sfidon opozitën dhe kërkon aleat për dalje nga ngërçi: “Po keqlexohet aktgjykimi i Kushtetueses”
Kryetari i Lëvizjes Vetëvendosje, Albin Kurti, ka akuzuar partitë e tjera shqiptare për keqinterpretim të aktgjykimit të fundit të Gjykatës Kushtetuese, duke thënë se ato po e lexojnë në mënyrë të gabuar dhe me qëllim politik. Një javë pas shpalljes së aktgjykimit, seanca konstituive e Kuvendit të Kosovës ka dështuar për të 41-tën herë radhazi, duke e mbajtur të bllokuar legjislaturën e re të dalë nga zgjedhjet e 9 shkurtit.
“Gjykata nuk ka thënë se komisioni për votim të fshehtë është antikushtetues, e as që ka konstatuar ndonjë shkelje nga kryesuesi Avni Dehari,” tha Kurti pas një takimi me drejtuesit e PDK-së dhe LDK-së. Ai theksoi se partitë opozitare janë në “lajthitje” dhe po e pengojnë konstituimin e Kuvendit me një interpretim të gabuar të Kushtetueses.
Ndërkohë, PDK, LDK dhe AAK insistojnë se votimi i kryetarit të Kuvendit duhet të jetë i hapur, në përputhje me frymën e aktgjykimit. Sipas tyre, Gjykata ka vënë në pah se mënyra aktuale e procedimit është në kundërshtim me rendin kushtetues.
Në këtë situatë të tensionuar, Kurti po kërkon mbështetje nga partitë e tjera shqiptare, veçanërisht nga Nisma Socialdemokrate. Ai ka konfirmuar se është në kontakt të vazhdueshëm me Fatmir Limajn, por negociatat nuk kanë sjellë ende një marrëveshje konkrete. Nisma, sipas burimeve, ka shtruar dy kërkesa kryesore: pozitën e kryetarit të Kuvendit dhe një paketë ligjore që përfshin uljen e pragut zgjedhor nga 5% në 2%.
“Besoj se lëvizje do të ketë gjatë këtij muaji, kur e kemi edhe afatin përfundimtar për konstituimin e Kuvendit,” tha Kurti në një intervistë për Tëvë1. Ai shtoi se megjithëse bashkëpunimi me Nismën duket i mundshëm, ende nuk ka dakordim brenda grupit parlamentar të Vetëvendosjes për ta mbështetur Limajn si kryetar Kuvendi.
Ish-kryetari i Gjykatës Kushtetuese, Enver Hasani, në një intervistë për Gazetën Express, e ka cilësuar vendimin e Kushtetueses si “të ndrojtur” dhe të paplotë. Sipas tij, opozita ka të drejtë të dërgojë lëndë të re, dhe vetë gjykata do të detyrohej të korrigjojë veten.
Presidentja Vjosa Osmani, ndërkaq, po zhvillon takime intensive me të gjitha partitë politike për të gjetur një zgjidhje para skadimit të afatit kushtetues 30-ditor. Ajo ka bërë thirrje për bashkëpunim dhe mirëbesim, duke theksuar rëndësinë e përmbushjes së detyrimeve institucionale në shërbim të qytetarëve.
Ngërçi politik rrezikon të thellohet më tej nëse brenda korrikut nuk arrihet një zgjidhje për konstituimin e Kuvendit, ndërsa palët mbeten të ngurta në qëndrimet e tyre. Kurti, ndonëse në formë për përplasje politike, është i vetëdijshëm se pa një aleat të ri, asnjë hap përpara nuk mund të bëhet.
